La lege nöia sön la Defenüda zivica dl 1996

Ala fin gnô les ghiranzes di defensurs popolars Steger y Palla ascutá sö. La lege provinziala sön la Defenüda zivica dl 1983 gnô tuta jö y sostituida cun na lege nöia. N impuls important por chësc svilup ê le congres internazional a Balsan, cherdé ite dala presidënta dl Consëi provinzial de Südtirol Sabina Kasslatter Mur ai 28 de merz dl 1996. Chësc convëgn â sciöche tema: „La Defenüda zivica, dala portina por reclamaziuns generales cina ala rapresentanza de interesc spezifics“. Cun la lege provinziala n. 14 di 10 de messé dl 1996 gnôl metü la fondamënta por na Defenüda zivica nöia. N valgönes ghiranzes dl defensur popolar da n iade y de chël en funziun gnô metüdes en pratica, insciö gnô la sënta dl’istituziun spostada tl Consëi provinzial. La competënza dl defensur popolar por chestiuns cun i comuns gnô reconesciüda dala lege. I ciamps de competënza dl defensur popolar gnô ampliá. Tl dagní dôl se fistidié esplizitamënter di ciamps dla sanité, dla natöra y dl ambiënt, sciöche ince di mituns y di jogn. Chiló preodô la lege nöia che le defensur popolar podess inciarié personal aposta cun funziuns spezifiches. Implü ti gnôl surandé al defensur popolar le dërt da inciarié profescionisć lëdi da arjigné arac iuridics.

Mo al defensur popolar en funziun Palla ne ti bastâ chësta reforma nia. Al se damanâ deplü comedöres. La lege odô tres ciamó dant na gran burocrazia tl laur dla Defenüda zivica, ince sc’ara n’ê ti 19 agn dl’ativité da denant mai gnüda tignida ite, mo ê tres gnüda odüda sciöche na „vincolaziun cuntra le prozedimënt“. La dorada dl’inciaria dl defensur popolar dô finalmënter nia plü ester liada al tëmp dl’inciaria dl Consëi provinzial, ciodiche „al se cheriëia insciö n clima de dependënza o al vëgn a s’al dé almanco na otica storta“. Mo le gran punt de deblëza dla lege odô Palla te sciöch’al gnô nominé le personal. „Le Consëi provinzial dess ti surandé al defensur popolar so personal, zënza che chësc ais n dërt de consultaziun“. De jená dl 1997 gnôl porté ite n regolamënt nü, che â bele atira sciuré sö n gran stöp. Le Consëi provinzial â deliberé che i comuns messess paié ite n contribut por i sorvisc dl defensur popolar (paragraf 2-bis). La desposiziun n’ê nia dër tlera y â gaujé ti agn dedô na discusciun daverta danter le defensur popolar Palla y le presidënt dl Consëi provinzial da inlaota Thaler.

La lege nr. 127 (Bassanini II) di 15 de ma dl 1997 â amplié le ciamp de competënza dl defensur popolar a livel statal. Aladô de chësta é i defensurs popolars regionai autorisá da d’ademplí la funziun dl defensur popolar ince ti confrunc di organs statai atifs tles singoles regiuns, tan inant ch’al ne vëgn nia metü sö n defensur popolar nazional. Tuc fora é ma i ciamps dla defenüda, dla segurëza publica y dla iustizia.
La sënta dla Defenüda zivica ê indô gnüda spostada. Dai locai strënc y nia neutrai tla Strada Crispi é i ofizi gnüs metüs tl cör dla cité vedla, tl Laubenhaus nr. 22, tla terza alzada.